Epizòd 16: Ou gen dwa di non

Charlot Elder, yon chantè ak etidyan nan sikoloji, se envite nou nan sèzyèm epizòd koze kilti vyòl. Avèk li, nou te fè yon ti rale sou Ou gen dwa di non. Pa egzanp, menm si randevou te gentan kase,  ou ka chanje lide depiw santi w pa sou sa ankò. Avan nou te resevwa Charlot Elder, Bibiana te vini ak atelye a  ki se yon seri fason pou nou aprann di non san nou pa oblije fè bri.

Charlot Elder te aksepte pale avè n nan telefòn pandan nou te nan stidyo ANVA a. Ansanm nou te rale sou ou gen dwa di non. Nou ka koute rezilta ti chita pale sa la :

Elder te komanse pale sou sa pou ki ka fè moun pè di non pandan yo pa anvi fè yon bagay  sitou yon fi. Li di se paske paske sosyete nou a se yon sosyete machist ak patriyakal kote yo pa pran non fi oserye epi yo panse gason se bèt sèks: yo toujou sou sa; pandan sa ka rive yo chanje davi. Li te menm pran egzanp sou tèt li  kote  li te gen yon randevou ak yon moun epi li vin chanje lide,  moun lan pa t twò byen pran l nan yon pwen li te blije rele yon zanmi l pou mande l si l te byen aji. 

Elder Charlot, te fon ti rale sou enpòtans pou n pale de fè bagay. Pou li, fòk nou pale de fè bagay avan nou fè bagay, pandan n ap fè bagay ak aprè nou fin fè bagay. Se konsa daprè li n ap ka tabli yon veritab kilti konsantman e konnen kisa patnè w vle tout bon vre. Li panse tou viktim lan konnen deja  li gen dwa di non. Pwoblèm lan se moun  k ap mande mande konsantman.  Se sou yo pou n plis mete fokis. Se yo ki pou aprann tande e konprann lè yon moun di yo non. Daprè li, se yo pou n edike ak sansibilize.

Nan epizòd sa tou, nou wè kèk sitiasyon kote moun yo anvi di non men lavi l depann de lamajay oubyen lajan moun ka p mande a ap ba li. Elder ensiste ankò pou edike potansyèl agresè yo paske viktim yo deja nan pozisyon feblès. Li panse se menm bagay pou  mizik tou. Solisyon se non sèlman pale ak mizisyen yo men edike yo paske mizisyen yo se moun sosyete a. Yo pale de sa yo wè, sa yo tande ak sa yo viv. Solisyon an se nan kontinye #PafèSilans.

Se pou ede fè chanjman sa, Ayiti Nou Vle A lanse pòdkas Koze Kilti Vyòl la. Si w ta renmen kite sijesyon pou amelyore pòdkas la, klike sou sijesyon. Si w ta renmen reyaji sou epizòd la an antye, kite yon kòmantè anba paj sa.

Mèsi pou enterè w pou pòdkas la. M kontan w la.

 

Alain


Vwa moun ki nan emisyon sa:

  • Animatè : Alain Délisca 
  • Envite:  Elder Charlot
  • Spòt: Karène Franck 
  • Atelye  Bibiana Mathieu 

Lokasyon: ANVA Studios. 

Miksaj: Patricia Camilien pou ANVA Medya.

Klike la pou dekouvri tout ekip pòdkas la.

Afichaj 1 reyaksyon

Souple, verifye imel ou pou w aktive kont ou.

Patisipe Rekrite Enfliyans

rete konekte ak nou